«Зангари» - Улысь Чатысь ужрадын

Улысь чатъёс гуртысьтызы, ёросысьтызы гинэ ӧвӧл, палэнысь но трос куноосты пумитазы – гуртазы башкиръёслэн «Гирей» выжызылы сӥзем пумиськон радъязы. Ужрад гуртысь ошмес вӧзын ортчиз. Отын калыкез сюлмаськытӥсь ужпумъёсты эскеризы. Со сяна, шулдыръяськыны но дыр луиз: ӵошатсконъёс, конкурсъёс, шудонъёс бадӟымъёсты но пичиосты огазеязы. Сцена вылын чузъяськись шулдыресь кырӟанъёс, задор эктонъёс котькинлы капчи мылкыд кузьмазы. «Зангари» ансамбль но ужрадэ пыриськиз. Соос учкисьёслы удмурт кырӟанъёссэс кузьмазы.  

Улысь Чатэ «Гирей» выжылэн тӧроез, северо-западной башкиръёслэн «Без Башкортлар» огазеяськонэнызы кивалтӥсь Радик Бахтиев но вуылӥз. Ужрадын со вераз: «Янаул ёрос администрацилы тау кылъёс верасько ужрадэз ортчытонлэсь бадӟым люкетсэ асьсэ вылазы басьтэмзы понна. Сыӵе юрттэт луэмен ик калык лулчеберетмы утиське, выжыысь выжые выже. Шумпотымон, йыйынын трос луизы егитъёс, пиналъёс. Соослэн синъёсазы яркыт тылгизьы пиштӥз – соослы ваньмыз тунсыко, мар герӟаськемын асьсэ выжыенызы».

Фото: Андреевский СК