Суредъёсазы инкуазьлэсь чеберзэ возьмато

«Усточикар» лагерьын суредаськон ӧрез туэ укмыс нылпи бырйиз. Соосты УдГУ-ысь искусствоосъя но дизайнъя институтын дышетскись Есения Миннегалиева дышетэ. Та нуналэ соослэн но суредъёссы инкуазен герӟаськемын вал. «Туж кельше суредаськыны, - вера Чернушкаысь Лиана Нигаматуллина. – Лагере мон берегес кыльыса ке но вуи, ваньмызлы дыши ни». Суредаськисьёс пӧлын шумпотыса тырше Вылысь Татышлыысь Василина Гарипова. Лагере со туэ кыкетӥ ползэ вуиз. Азьвыл «Дӥськут дизайн» ӧрын тыршем. Табере шумпотыса нуллэ соку вурем  чебер удмурт дэремзэ. Нош табере суредъёсыз синмаськымон чебер пӧрмо. Ӝоген суредаськисьёс валтӥсь ужзы борды кутскозы. Соин лагерь йылпумъяськон нуналэ тодматскыны луоз. Есения Вадимовналэн кылъёсызъя, отчыозь соос батикен ужаны но дыр шедьтозы.