Асавкаын Арбузлэсь нуналзэ пусйизы

Балтач ёросысь Асавкаысь модельной библиотекаын но клубын ужасьёс Г. Миннигалиева но Л. Пукрокова нылпиослы «День весёлого арбуза!» праздник радъязы.

Куинетӥ гудырикошкон – Арбузлэн калыккуспо нуналыз. Сое Асавка гуртын но пусйизы. Нылпиос та нуналэ арбуз сярысь трос тунсыкозэ тодӥзы, соин герӟаськем мадиськонъёслы валэктонъёс сётъязы, ӝогверанъёсты вераса ӵошатскизы, викторинае пыриськизы, яркыт но чебер суредъёс суредазы. Праздниклэн кыкетӥ люкетэз тужгес но ческыт луиз. Нылпиосты ческыт кузьымен – арбузэн – куноязы.

Фото: Асавская сельская библиотека- музей