Нацпроектъёс улонэ пыӵало

Республикаысь премьер-министрлэн Андрей Назаровлэн кылъёсызъя, коньдонлэн 41 процентэз уже кутэмын ни. Кылем арысь та дырен ӵошатоно ке, лыдпус тямыс процентлы тросгес. Азинлыко быдэстӥсько «Инфраструктура для жизни», «Туризм», «Экология» но «Семья» нацпроектъёс. Кызьы пусъе А. Назаров, ар кутсконысен регионын тупатэмзы бере кык выж, коммунальной инфраструктуралэн сизьым объектэз, нылкышноослэсь тазалыксэс эскерон ньыль центръёс усьтэмын, даслэсь ятыр калыко интыос тупатэмын, 50 иськем сюрес лэсьтэмын, 38 адями куажганы вуэм юртысь мукет корка улыны интыямын. Ар пумозь республикаын трос уж лэсьтыны чакламын: 36 школаез, куать нылпи садэз но колледжез тупатозы, 143 калыко интыосты выльдозы, 83 выль автобус басьтозы, 300-лэсь трос адями вуж юртсэ вылезлы воштоз.