+20 °С
Ясно
Общество
10 Июля , 17:59
Ӵошен ортчытэм вакытсы сюлэмазы яркыт пытьы кельтӥз
Гужем ӵыдонтэм чебер инкуазеныз узыр луэ. Возь вылэ потӥд ке, сяськаос пӧлын мылкыд лӧптэ, тэльёс вуэм емышъёсынызы бордазы ӧтё. Таӵе дыръя чидалод шат гуртын улыны, сюлэм весь эрико дуннее кыстӥське, чылкыт омыре куриське.
Ӵошен ортчытэм вакытсы сюлэмазы яркыт пытьы кельтӥз
Калтасы ёросысь Бадӟым Туганеевоысь нылкышноос одӥг нуналзэс кыре потыса ортчытӥзы. Угось юрт котырысь ужлэн йылыз-пумыз ноку уз луы, нош гужемлэн чеберлыкез туж ӝог ортче. Шунды шорын кисьтаськись удмурт дэремъёссэс дӥсяса, кышномуртъёс гурт вӧзысьтызы возь вылэ дыртӥзы. Татын соос тӧдьы ромашка дуннее шедизы. Озьы кылдӥз нылкышноослэн чебер сяськаослэсь тугоко керттон сярысь малпанзы. Ӵошен соос удмурт гуръёсты кырӟаса но егит дырзэс тодазы вайыса сяськаослэсь йыразы понон керттӥзы.
Дыр туж ӝог ортчиз. Удмурт кышномуртъёслэн тугокооссы синмаськымон пӧрмизы. Нош кыре потыса ӵошен ортчытэм вакытсы сюлэмазы пыраклы шуныт пытьы кельтӥз.
Фото: Большетуганеевский сельский клуб
