Ог-огзэс валаса, ӟеч вуонозылы оскыса вамышто улон сюрестӥ

Нунал бӧрсьы нунал, толэзь бӧрсьы толэзь - ортчо аръёс. Озьы мынэ улон. Татышлы ёросысь Вылысь Татышлыысь Вероника но Николай Гарифяновъёслэн улон сюрессы 2010-тӥ арысен азинске. Кузпалъёс нокыӵе дано нимен пусъемын ӧвӧл. Соос дано асьсэлэн лякыт, тыршись, ужез яратӥсь луэменызы. Шуг-секытъёсты но соос ӵошен вормо.

Улысь Балтачын вордскыса будэм нылаш но Вылысь Татышлыысь пияш гуртын ӝыт шудон пӧлын тодматскиллям. «Соку кыкнамы но Пермь шаерысь Чернушкаын ужаськом вал, нош тодматским Выль арын Улысь Балтачысь клубын», - верало егит кузпалъёс. Ӵошен улон сюрессэс но соос Чернушкаысен кутскиллям. Малпанзы вылэм отчы корка пуктыны. Но улонын ваньмыз малпамъя гинэ уг пӧрмы. Озьы Гарифяновъёс Вылысь Татышлые бертӥллям. «Нырысь Колялэн анай-атаенызы ӵош улӥм. Собере, корка басьтыса, отчы улыны выжим», - вера Вероника Тагировна. Соку Вероника Ленин нимо СПК-ын ветврачын тыршем. «Гурт удысын ужась егит ӧнерчиослы чаклам программаен пайдаяськыны малпанмы вань вал, но черодэз кема витёно луиз. Коркамес асьме кужымен ик вутӥм, 2019-тӥ арысен выль коркамы улӥськом, - шуо Гарифяновъёс. - Бадӟым тау анай-атайёслы юрттэт возьматэмзы понна. Соос котьку сюлмасько, милям ваньмыз умой мед луоз шуыса». 

Та дыре Николай Кондратьевич Куедаысь сӥль комбинатын голубцы дасян цехын оператор луыса ужа, Вероника Тагировна - Вылысь Татышлыысь «Регионстрой» огазеяськонын кассир-консультант. Егит кузпалъёслэн шутэтскон нуналъёссы котьку ӵош уг тупало. Нош тупа ке, соос ваньмон дырзэс ӵошен бадӟым уж быдэстонлы, семьяенызы шутэтсконлы сӥзё.

(Быдэсак лыдӟе газетлэн 27-тӥ номерысьтыз).