Шудбурзы но, узырлыксы но нылпиоссы бордын

Со дырысен трос дыр ортчемын ке но, соос ваньзэ али кадь тодазы возё на. Венералэн син азяз на УдГУ-ын дышетскем аръёсыз – со журналистикая факультетын тодон-валан басьтӥз. Та вакытэ ик армиысь кузпалзэ возьмаз. Егитъёс улон сюрессэс 2008-тӥ арын герӟазы. Но солдат улон кусыпъёссэс быдэс арлы люкиз. Со бӧрсьы соос котьку артэ вамышто. Бен, кузпалъёс туала вакытэ но дырын-дырын ог-огзылэсь люкиськоно луо. Семьялэн йырыз палэнын ужа угось.

«2010-тӥ ар ми понна вунонтэм луиз, - вера Венера Анатолиевна. -Соку кема возьмам сюанмес шудӥмы, улон сюресмес весяклы герӟамы». Венералэн тодэ ваёнъёсыз та арен мур герӟаськемын. «Соку гужем туж пӧсь луиз, одӥг шапык но зор ӧз усьы», - шуэ Венера. Озьы ке но егитъёс со пумысен ӧз куректэ, ваньмыз бордысь ӟечсэ утчаны тыршизы. Озьы соос шӧдыса ик ӧз вуттэ, нуналъёслэсь ог-огзы сьӧры туж ӝог быземзэс. 2015-тӥ арын егит кузпалъёслэн нырысетӥ нунызы вордӥськиз. Та вакытэ Кирилл куатетӥ классэ дышетскыны выжиз, со пӧртэм олимпиадаосын вормисьёс пӧлын луэ. Тимур но, кыкетӥез пизы, анай-атайзэ котьку шумпоттыны тырше. Со усто дышетскемез сяна, сцена вылысь одӥгез ӝужась кизили луэ. Тимур, атаез сямен ик, берло аръёсы трос благотворительной концертъёсын учкисьёсты шумпоттӥз. Вераны кулэ, А. Ильбаев но пичиысен сцена вылын будӥз – со кырӟа, баянэн усто шудэ. Туннэ кузпалъёс кыкназы ик гуртысьтызы культура юртысь «Зангари» калык ансамбле ветло. Табере соос сьӧры вамыштэ нылпи садэ ветлӥсь Даша нылзы но. Сое Красный Холме эктонъя кружоке нулло. Эшъёсыныз ӵош со Нефтекамскысь, Уфаысь сцена вылын эктӥз ни, вормонлэсь шӧмзэ но веръяса вуттӥз. Нылпи садазы но соос анай-атайёссэс чебересь эктонъёсынызы паймыто.

Ильбаевъёслэн семьязы сярысь пыр-почгес лыдӟе газетмылэн нырысетӥ пӧсьтолэзе потэм номерысьтыз.