Кышномурт вить миллион котыр коньдонзэ ыштӥз

Нылкышнолы домофонзэ воштыны курыса жингыртӥсь луиз. Соиз «управляющей компаниысь ӧнерчилы» оскыса, телефоназ вуэм СМС-кодэз вераз. Берло кышномуртлы Росфинмониторингын «ужась» жингыртӥз но Госуслугиысь личной кабинетаз мошенникъёс пырыны быгатӥллям но кунгож сьӧрын улӥсь адямилы кредит басьтӥллям шуыса ивортӥз. Кема улытэк нылкышнолэн телефоназ  ФСБ-ысь «ӧнерчиос» вазиськизы. Соосыз кышномуртэ кунгож сьӧрысь террористъёслы юрттӥськод шуыса уголовной уж усьтонэн  кышкатӥзы но вань коньдонзэ нимысьтыз счётэ выжтыны куризы. Мошенникъёслэн куриказы шедем нылкышно дуно машиназэ вузаса но луэм коньдонзэ банкысь басьтыса пӧяськисьёслы сётӥз. Со вакытысен жингыртӥсьёслэн пытьызы но ышиз. Соку гинэ кышномурт мошенникъёслэн ки улазы шедемзэ валаз. Нош вить миллион манетсэ тодмотэм адямиослы «кузьмаз».