Медло котьку чылкыт чагыр инбам!

Инбам медло котьку чылкыт чагыр,
Котькуд ӵукна мед вордӥськоз шунды,
Мед ӝужалоз пичи нюлэс кушын
Котькуд тулыс тӧдьы лымыгырлы.
Гербер но, италмас но ӝужалоз,
Льӧмпу но выль кенак кадь мед пукоз,
Мед кырӟалоз солэн ваяз уӵы,
Армес лыдъялляса – силёз кикы.
Жильыртыса ошмес но мед пӧзёз,
Мед луозы ӵукна но пеймыт уй,
Мед вуозы гужем но толалтэ –
Ожо-вожо но юг-тӧдьы лымы.
Мед бергалоз музъем шунды котыр,
Солэн сиез ноку медаз кысы.
Юг Инмаре! Тон жаля лулъёсмес,
Мед утёмы ми ас вордэм Дормес.
Татьяна ХАРИСОВА.