Кирга гуртын шуныт пумиськон ортчиз

Куеда ёрослэн 100 ар тырмонэзлы сӥзем ужрадэ Кирга гуртысь арлыдоос но пыриськизы. Соос нылпиослы азьвыл улэмзы, ужамзы сярысь трос тунсыкозэ веразы. Кылсярысь, Зинаида Аконовна Темраева пиналъёслы гуртлэн, урамъёслэн историенызы тодматӥз, Быдӟым Атыкай ож вакытэ гуртооссылэн ужамзы, улэмзы сярысь вераз. Дышетонлэн, школаослэн азинскемзы но дышетӥсьёс сярысь мадиз историяя дышетӥсь Ирина Андреевна Шимановская. Раиса Садртдиновна Менладшиналэн верамысьтыз нылпиос «Выль сюрес» колхозлэн азинскемез сярысь тодӥзы. Нош Людмила Гадиятовна Ракимова «Выль сюрес» хозяйствоын пӧртэм аръёсы скал кыскисьёсын, гурт удысын тыршись мукет ужасьёсын тодматӥз. Шуныт пумиськон гуртлы сӥзем кырӟанэн йылпумъяськиз. Кырӟанлэсь кылъёссэ гожтӥз Зинаида Темраева.

Фото: Киргинская сельская библиотека и ее читатели.