Гуртэн вӧсе сӥзиськон

Али тӥледлы ӵектӥськом Татышлы ёросысь Бальзюга гуртысь Назип Садриевич Садриевлэн сӥзиськон дыръя куриськон кылъёсыныз тодматскыны. 

Гуртэн вӧсе сӥзиськон

«Остэ, ӟугыт тӧдьы бур Инмаре-Кылчинэ, тани.

Гуртэн огкылсинмысь луса, ог анаййлэн-атайлэн нылыз-пиез кадь луса, тани тыр шыдэн сӥзиськисько, ӟугыт тӧдьы бур Инмаре-Кылчинэ, тани.

Шумпотысалмы, шуддэ-бурдэ сётса мын вал, ӟугыт тӧдьы бур Инмаре-Кылчинэ, тани.

Тулыс виясь вуэд сяин, чор виясь вуэд сяин азвесь кылльымон сётса ке мынсалэд, ӟугыт тӧдьы бур Инмаре-Кылчинэ, тани.

Бусые потон вапум дыръя тани, пельпум капчилыкъёстэ ачид сётса ке мынсалэд, ӟугыт тӧдьы бур Инмаре-Кылчинэ, тани.

 Шумпотысалмы, шуддэ-бурдэ сётса мын вал, ӟугыт тӧдьы бур Инмаре-Кылчинэ, тани.

Пудоез кыре поттон дыръя, ыштэк ческыт вуостэ, турынъёстэ, ческыт сиёнъёстэ ачид сётса ке мынсалэд, ӟугыт тӧдьы бур Инмаре-Кылчинэ, тани.

Шумпотысалмы, шуддэ-бурдэ сётса мын вал, ӟугыт тӧдьы бур Инмаре-Кылчинэ, тани.

Гуртэн огкылсинмысь луса, ог анаййлэн-атайлэн нылыз-пиез кадь луса, тани тыр шыдэн сӥзиськисько, ӟугыт тӧдьы бур Инмаре-Кылчинэ, тани.

Усыяны потон вапум дыръя, пельпум капчилыкъёстэ ачид сётса ке мынысалэд, ӟугыт тӧдьы бур Инмаре-Кылчинэ, тани.

Камыш куроен, куамын куроен далтытыса кемынысалэд, ӟугыт тӧдьы бур Инмаре-Кылчинэ, тани.

Гуртэн огкылсинмысь луса, ог анаййлэн-атайлэн нылыз-пиез кадь луса, тани тыр шыдэн сӥзиськисько, ӟугыт тӧдьы бур Инмаре-Кылчинэ, тани.

Шумпотысалмы, шуддэ-бурдэ сётса мын вал, ӟугыт тӧдьы бур Инмаре-Кылчинэ, тани.

Сапрак гинэ небыт зоръёстэ ачид сётса ке мынсалэд, ӟугыт тӧдьы бур Инмаре-Кылчинэ, тани.

Силедлэсь-дауэдлэсь ачид сакласа ке мынсалэд, ӟугыт тӧдьы бур Инмаре-Кылчинэ, тани.

Лек пужмеръёслэсь ачид сакласа ке мынсалэд, ӟугыт тӧдьы бур Инмаре-Кылчинэ, тани.

Шумпотысалмы, шуддэ-бурдэ сётса мын вал, ӟугыт тӧдьы бур Инмаре-Кылчинэ, тани.

Гид тыр пудоед, тани чышконо ыжед, кысконо скалэд, вӧё вышкыен, муо вышкыен ачид сётса ке мынсалэд, ӟугыт тӧдьы бур Инмаре-Кылчинэ, тани.

Азбар тыр ӵӧж-ӟазеген гурлашыса улон сётса ке мынсалыд, ӟугыт тӧдьы бур Инмаре-Кылчинэ, тани.

Мушо вуэн улны ачид сётса ке мынсалэд, ӟугыт тӧдьы бур Инмаре-Кылчинэ, тани. Оминь!

Ми кабыл карыса басьтӥськом, ӟугыт тӧдьы бур Инмаре-Кылчинэ, тани.

Остэ, ӟугыт тӧдьы бур Инмаре-Кылчинэ, тани.

Гуртэн огкылсинмысь луса, ог анаййлэн-атайлэн нылыз-пиез кадь луса, тани тыр шыдэн сӥзиськисько, ӟугыт тӧдьы бур Инмаре-Кылчинэ, тани.

Араны потон вапум дыръя тани, пельпум капчилыкъёстэ ачид сётса ке мынсалэд, ӟугыт тӧдьы бур Инмаре-Кылчинэ, тани.

Суслон вӧзы суслонтыса ке мынсалэд, ӟугыт тӧдьы бур Инмаре-Кылчинэ, тани.

Кабан пыртон дыръя, пар вал тыр сётса ке мынсалэд, ӟугыт тӧдьы бур Инмаре-Кылчинэ, тани.

Та кабанэз паськыт карылыса потымон сётса ке мынсалэд, ӟугыт тӧдьы бур Инмаре-Кылчинэ, тани.

Кабанъёс липем улэ пыртон дыръя тани, липон дыр сётса ке мынсалэд, ӟугыт тӧдьы бур Инмаре-Кылчинэ, тани.

Туэ нош сюлысэн-пужен басьтон дыръяз тани, синонтэм дыръёстэ ачид сётса ке мынсалэд, ӟугыт тӧдьы бур Инмаре-Кылчинэ, тани.

Тылпу гаудэослэсь ачид сакласа ке мынсалэд, ӟугыт тӧдьы бур Инмаре-Кылчинэ, тани. 

Гуртэн огкылсинмысь луса, ог анаййлэн-атайлэн нылыз-пиез кадь луса, тани тыр шыдэн сӥзиськисько, ӟугыт тӧдьы бур Инмаре-Кылчинэ, тани.

Шуныт ки вылад басьтыса мын вал, ӟугыт тӧдьы бур Инмаре-Кылчинэ, тани. 

Чередлэсь-чуредлэсь ачид сакласа ке мынсалэд, ӟугыт тӧдьы бур Инмаре-Кылчинэ, тани. 

Тыл ӟангышонъёслэсь ачид сакласа ке мынсалэд, ӟугыт тӧдьы бур Инмаре-Кылчинэ, тани. Оминь!

Ми кабыл карыса басьтӥськом, ӟугыт тӧдьы бур Инмаре-Кылчинэ, тани.

Остэ, ӟугыт тӧдьы бур Инмаре-Кылчинэ, тани.

Гуртэн огкылсинмысь луса, ог анаййлэн-атайлэн нылыз-пиез кадь луса, тани тыр шыдэн сӥзиськисько, ӟугыт тӧдьы бур Инмаре-Кылчинэ, тани.

Четэ потэм бэндэед, тани, буш мешокен потса кошкыса, тыро мешокен бертса ке пырысалзы, ӟугыт тӧдьы бур Инмаре-Кылчинэ, тани.

Кыл ӟангышонъёслэсь ачид сакласа ке мынсалэд, ӟугыт тӧдьы бур Инмаре-Кылчинэ, тани.

Та паськам бэндэослы ӟеч иворъёс сётса ке мынсалэд, ӟугыт тӧдьы бур Инмаре-Кылчинэ, тани.

Та толэзед, хэттэр шундыед кадь улыны сётса ке мынсалэд, ӟугыт тӧдьы бур Инмаре-Кылчинэ, тани.

Кузьыли каръяськыса кылле, кузьыли каръяськем кадь улыны сётса ке мынсалэд, ӟугыт тӧдьы бур Инмаре-Кылчинэ, тани.

Кӧкыын саби кылле, кӧкыын саби кыллем кадь улыны сётса ке мынсалэд, гижы-пиньёслэсь ачид сакласа ке мынсалэд, ӟугыт тӧдьы бур Инмаре-Кылчинэ, тани.

Остэ, ӟугыт тӧдьы бур Инмаре-Кылчинэ, тани.

Гуртэн огкылсинмысь луса, ог анаййлэн-атайлэн нылыз-пиез кадь луса, тани тыр шыдэн сӥзиськисько, ӟугыт тӧдьы бур Инмаре-Кылчинэ, тани.

Шумпотысалмы, шуддэ-бурдэ сётса мын вал, ӟугыт тӧдьы бур Инмаре-Кылчинэ, тани.

Сӥзьыл виясь вуэд сяин, чор виясь вуэд сяин азвесь кадь улымон сётса ке мынсалэд, ӟугыт тӧдьы бур Инмаре-Кылчинэ, тани.

Лымы жокатонъёслэсь ачид сакласа ке мынсалэд, ӟугыт тӧдьы бур Инмаре-Кылчинэ, тани.

Оло азьло верасько, ӟугыт тӧдьы бур Инмаре-Кылчинэ, оло берзэ верасько, ӟугыт тӧдьы бур Инмаре-Кылчинэ, милесьтым вуттымтэосыз ачид вуттыса мын, ӟугыт тӧдьы бур Инмаре-Кылчинэ.

Шуныт ки вылад басьтыса мын, ӟугыт тӧдьы бур Инмаре-Кылчинэ, кабыл кар, ӟугыт тӧдьы бур Инмаре-Кылчинэ. Оминь!»