Шуныт, югыт юртазы ог-огзэс валан но шумпотон кузёяське

Фарида Зиятдиновналэн пинал дырыз Арлян гуртын ортчиз. Татысен ик со Выль Киргаысь егит пияшен тодматскиз. «Кык ар эшъяськеммы бере кузпалъяським. Выль Киргаын дас одӥг ар улӥм. Отын нылпиосмы вордскизы. Кузпалылэн анай-атаез улонысь кошкем бере, Арлян гуртэ улыны выжим,
- вера Фарида Зиятдиновна. – Кызь арлы матэ ни та коркамы улӥськом». Кузпалъёслэн ужан аръёссы гурт удысын тыршыса ортчемын. Фарида Зиятдиновна
тямыс классэз йылпумъяса, курег фермае ужаны вамыштэм. Бӧрысь кема аръёс ӵоже парсь вордон комплексын, ош утён фермаын скотникын тыршем.  «Огъя ужан стаже 32 ар. Выль Киргаын улыкумы парсь вордон комплексэ ужаны автобусэн ветлӥм. Киргаос отын 7-8 кузя ужазы. Соку ужъёсты киын быдэсъям, али ваньмыз механизированной», - ужан аръёссэ тодаз вайыса вера Фарида Зиятдиновна. Ф. Галиналэн кема аръёс ӵоже адӟем карымон, ӟеч но вылӥ лыдпусъёс басьтыса тыршемез трос Данъян грамотаосын пусъемын.
Воинслав Валиахметович дас классэз йылпумъяса, дышетсконзэ Дуванысь гурт хозяйствоя техникумын азинтэм. «Ёрос газетысь Дуванысь техникум егитъёсты дышетскыны кутэмез сярысь ялонэз адӟи. Соос асьсэос татчы лыктыса, экзамен радъязы. Химияя но ӟуч кылъя экзамен сётӥ, - тодаз вайыса вера Воинслав Валиахметович. – Умой дышетски. Ньыльёслы но витьёслы дышетскисьёслы стипендия тыризы. Мон но комсомольской стипендиат вал. Дуванын кык но ӝыны ар ӵоже тодон-валан люкай». 

(Быдэс материалэз лыдӟыны быгатоды газетлэн 2026-тӥ арысь нырысетӥ номерысьтыз).