Удмуртъёс «В созвездии народов» концертэ пыриськизы

Концертэ кузёос сяна, Чишмы, Стерлитамак, Татышлы ёросъёсысь финн-угор коллективъёс пыриськизы. Татчы люкаськем калыкез республикаысь удмурт калыклэн лулчеберетэныз тодматӥзы Татышлы ёросысь Улысь Балтачысь «Ӧрӟи» но «Палэзь» («Рябинушка») калык ансамбльёс, БР-ысь культура удысысь сӥё-дано ужась Алик Кайранов. Учкисьёслы Башкортостанысь мордваослэн, поръёслэн но удмуртъёслэн лулчеберетсэс, кылзэс утьыны быгатэмзы пумысен шумпотыса вераськиз Россиысь финн-угор калыкъёслэн ассоциациенызы кивалтӥсь Петр Николаевич Тултаев. Ужрадэ со Данъян грамотаосын вуиз. Петр Николаевич Россиысь калыкъёслэсь кусыпъёссэс юнматон, кылзэс, культуразэс утён бордын тыршисьёсты  ужкагазъёсын пусйиз. Удмуртъёс пӧлысь сое Башкортостанысь удмуртъёслэн национально-культурной центренызы кивалтӥсь Людвиг Зидымаков, солэн воштӥсез Юрис Саитов, «Ошмес» газетлэн валтӥсь редакторез Оля Нигаматуллина басьтӥзы. Нош "Ӧрӟи" ансамбльысь кырӟасьёсты Янис Рафиковез но Олег Мардановез БР-ысь Культурая министерстволэн Таукаронэныз шумпоттӥзы, Вылысь Татышлыысь культура юртын ужасез Гульфина Ильтимироваез - БР-ысь Культурая министерстволэн Данъян грамотаеныз.