Танып дуре, арамае огпол ке но потэ ветлэм

Потэ кылзэм тюрагайез,

Шильыртэмзэ сирпу куарлэсь,

Кызьы юмша арамаын

Ыркыт толэд эркын-эркын.

Потэ кылзэм турын-куарлэсь,

Шунды шоры кыстиськемзэ,

Шапыр-шапыр шуныт зорлэсь

Музъем вылэ усьылэмзэ.

Адзем потэ лулпуослэсь

Пельугыос ошылэмзэс,

Танып кузя будись бадьлэсь

Шуре бамзэ коттылэмзэ.

Карнан ошса пельпум вылаз

Ву нуисез потэ адзем.

Салкым шурын пыласькыса,

Мукет яре потэ выжем.

Оло соку мозмон кельтоз,

Сюлэм вылам капчиялоз,

Егит дыры ук кытын ке

Та котырын лушкем калге.

Татьяна ХАРИСОВА. 

                                       28.04.08