Россилэн кужымез калык бордын

Со улсын трос ужрадъёс ортчо. Пермь шаерысь Куеда округысь Вуж Шагирт гуртын, та арез усьтонлы сӥзьыса, «Под небом единым» благотворительной концерт радъязы. Ужрад трос калыкез огинэ люказ. Сцена вылэ потӥзы нылпи садысь пичильтокъёс но, школаын дышетскисьёс но, культура удысын тыршисьёс но, ансамбпе ветлӥсьёс но. Концерт номеръёссы пыр соос шаерамы пӧртэм калыкъёслэсь тупаса улэмзэс возьматӥзы: та нуналэ удмурт но ӟуч кырӟанъёс, эктонъёс одӥг бугоре биниськизы. Концертэз кык кылын – ӟуч но удмурт – нуизы. Угось вуж шагиртъёс удмурт кылэз дышетонлы дурбасьто. Та ужпумез соос ӝутӥзы кылем ар пумын. Нош 30-тӥ толшоре кенешон радъязы. Отчы песяй-песятайёс, анай-атайёс но нылпиос пыриськизы. Собраниын соос огкылэ вуизы, удмурт кылэз внеурочной деятельностьлы висъям дырын дышетозы шуыса.

Фото: соцсети Алина Надырова