Утёме анай кылмес

Вордскем кыллы сӥзем ужрадэз республикаысь удмуртъёслэн историяя но культурая центрзы радъяз. Отчы Татышлы ёросысь Выль Татышлыысь полилингвальной школаын 5-тӥ классын дышетскисьёс пыриськизы. Соос кык командалы люкиськыса «нюръяськизы». Нылъёс но пиос ӟуч, удмурт но бигер кылъёсты тодэмзэс возьматӥзы

Шудон куинь турлэсь сылӥз. Нырысь пиналъёс пӧртэм юанъёслы валэктонъёс утчазы. «Загадочный песьтэр» тур мадиськонъёслы сӥземын вал. Нош куинетӥ турын нылпиослы визькылъёсты тодазы ваёно, соослэсь пуштроссэс валэктоно луиз. Квиз пиналъёслы туж кельшиз. «Ужрад тунсыко но со дыре ик малпаськытӥсь вал. Пословицаосты тодон секыт йӧтӥз», – вералэ ужрадэ пыриськемъёс.

«Анай кыллэн калыккуспо нуналаз вань кылъёс огвыллем дуно, матын луо. Та нуналэ котькуд адями аслаз вордскем кылыз, солэн вуоноез сярысь малпаськыны кулэ. Асьмеос та нуналэ малпаськыны, макем трос кылъёс вань шуыса, соосты дунъяно. Угось кыл – со калыклэн лулчеберетэз», - вера удмуртъёслэн историяя но культурая центрысьтызы валтӥсь ӧнерчи Ксения Милиятова.

Фото: Удмуртский историко-культурный центр