Кипчакысь клубын анай кыллы сӥзем ужрад ортчиз

21-тӥ тулыспалэ анай кыллэн калыккуспо нуналэз пусйиське. Та лыдпус улсын Пермь шаерысь Кипчак гуртысь клубын «Анай кыл, удмурт кыл» праздник ортчиз. Со сяна, ужрад Россиысь калыкъёслэн огъя луон арзылы сӥземын вал.

Анай кылэз данъян ужрадэ Куеда ёросысь куать удмурт ансамбльёс пыриськизы. Шумпотымон, та ӝытэ сцена вылын нылпиос но шулдыртӥзы. Лыктэм куноос но кузёос кырӟан-эктонъёссы пыр удмурт лулчеберетлэсь узырлыксэ паськыт возьматӥзы. Учкисьёс котькуд номеръёсты кужмо кичабонъёсын пумитазы. Анай кыллы сӥзем ужрад яркыт но шулдыр ортчиз, Кипчакысь клубе люкаськем калыклы шуныт тодэ ваёнъёс кельтӥз.

Фото: «Кипчакский сельский клуб»