+24 °С
Зоръёслэн
Общество
28 январь , 07:00
Семья бордын кужыммы но осконмы
2026-тӥ ар Башкортостанын Бадӟым но эшлыко семьялэн ареныз ялэмын. Республикалэн тӧроез Радий Хабиров Выль ар азьын ӟечкыланаз тазэ арез семьялы сӥзьыны ӵектӥз. «Эшлыко, шудо семья, кытын чузъяське жигрес нылпи куара – со асьмелэн осконмы, кужыммы», - вераз Радий Фаритович. Ермекей ёросысь Купченей гуртысь Гузалия но Алексей Матвеевъёс улон сюрес кузя дас вить ар ӵош вамышто. Соослэн вить нылпиоссы будо. Матвей, Тимофей, Эмилия, Елисей, Гордей анай-атайзылэн шуныт бурд улазы шудо будо. Бадӟым семьяын яратон, ог-огдэ валан, ог-огедлы юрттӥськон мылкыд кузёясько угось.
Семья бордын кужыммы но осконмы
Князевка гуртысь Гузалия вуоно кузпалыныз Купченее эшез доры куное лыктыса тодматскем. Егит сюлэмъёс пӧлын яратон тылгизьы кенжем. Кематэк бигер нылаш но удмурт пи семья кылдытӥллям. Соослэн гуртлэсь палэнэ кошкыса улон малпанзы луымтэ, Купченее интыяськизы.
- Туала вакытын гуртын улыны луонлыкъёс вань. Чылкыт омыр, аслад музъемад будэтэм бакча сиёнъёс, емышъёс тазалыклы пайдаё луо, - шуо Матвеев кузпалъёс. – Со сяна, гуртын ик уло матысьёсмы. Соослы котькыӵе ужпумен вазиськыны – юрттозы. Ми туж тупаса улӥськом. Купченейёс огкылысь кариськыса улыны дышемын.
Матвеев кузпалъёс асьсэос но трос нылпиё семьяын будэмын: Гузалия – витетӥ нылпи, Алексей – куинь пиос пӧлысь бадӟымез. «Кык пиосмы вордскизы, ныл нуны вешаммы потыны кутскиз. Малпанмы быдэсмиз - Эмилия вордӥськиз. Со бере – кык пиосмы. Бадӟымез пимылы, Матвейлы, 14 арес, нош Гордейлы - куинь», - вера Г. Матвеева. Солэн кылъёсызъя, бадӟым семьяын нылпиос ог-огзылы юрттӥськыса, ужлы дышыса будо, оскымон кивоштӥсьёс луо. Матвеевъёслэн семьяязы удмурт, бигер калык сям-йылолъёс утисько.
(Быдэсак лыдӟе газетысь).
