Ӟазег ишкон вемее люкаськизы

Башкортостанысь удмуртъёс сӥзьыл  ӟазег ишкон веме каро. Отчы кузё кышно матысьёссэ, бускель кышномуртъёсты ӧте. Ӟазег-ӵӧжъёссы трос ке, вемее дас кузя но люкасько. Тылобурдоосты вандон борды ӵукна кутско.

Ӟазег ишкон куспазы нылкышноос ас улонзы, сюлмаськонъёссы, шумпотонъёссы сярысь верасько, пӧртэм кырӟанъёс кырӟало. Куд-ог гуртъёсын, азьло вакытъёсы выллем, ӟазегъёсты карнанэ ошыса, ошмесэ нуыса мисько. Та йылол, кылсярысь, Татышлы ёросысь Юда гуртын возиськемын. Алигес юдаос Мухаметьяновъёс дорын ӟазег ишкизы. Ӟазег ишкисьёслы тау карыса, кузёос соосты ческыт ӝукен но ӟазег сӥлен, пыжиськемъёсын куноязы.

Фото: Деревня Юда Татышлинского района