Анай кылэз утён сярысь вераськизы

Отын пӧртэм площадкаос ужазы. Валтӥсь инты висъяськиз «Анай кылдэ яратытэк, мукетсэ уд дышы гажаны» котырес ӝӧк сьӧрын вераськонлы. Нылпи садысь визьнодасьёс, дышетӥсьёс, культура удысын тыршисьёс отын анай кылэз дышетонэн, сое утёнэн герӟаськем трос ужпумъёсты сэрттӥзы-пертчизы. Котырес ӝӧк сьӧрын вераськонэ республикаысьтымы пӧртэм ёросъёсысь, Пермь шаерысь Куеда ёросысь, Удмурт Элькунысь Шаркан ёросысь делегациос пыриськизы. Соос котькудзы асьсэлэн быдэстэм ужъёссы, сюлмаськонъёссы сярысь веразы.Татын ваньзы огкылысь шуизы: «Анай кылэз семья, нылпи сад, школа но мукет дышетскон юртъёс валче ужаса гинэ утьыны луоз».