Ӵошен ортчытэм вакыт шумпотон кузьмаз

«Марӟан» удмурт фольклор ансамбле но Бадӟым Туганеевоысь «Центр активного и здорового долголетия» огазеяськонэ пыриськись кышномуртъёс ӵошен шутэтскон вылысь кыре потӥзы. Инкуазьлэн пӧртэм буёлъёсын кисьтаськись чеберлыкез пумиськонзэс эшшо но шунытгес но яркытгес кариз. Кышномуртъёс азьвыл сямен тыл вылын картошка пыжизы. Сиёнзылэн ческыт зынэз котыр улосэ вӧлмиз. Нош пӧртэм пыжиськемъёсын тырмытэм ӝӧксы удмурт калыклэн паськыт лулпушез сярысь вераз.

Кыре люкаськемъёс бер ӝытозь  шулдыръяськизы. Ӵошен соос удмурт шудонъёсын но шудӥзы, зарядка карыны но вуизы. Нош гуртысьтызы фельдшер С.С. Шарипова кышномуртъёсын тазалыкез юнматыны юрттӥсь амалъёсын люкиськиз, таза улон сярысь вераськон ортчытӥз.

Кышномуртъёс гуртазы ӝутскем мылкыдын вуизы. Угось ӵошен шудыса, серекъяса ортчытэм вакыт соослы шумпотон но выль кужым кузьмаз.

Фото: Большетуганеевский сельский клуб