Инкуазен кусыпъёс мед юнмалозы

Калтасы ёросысь Бадӟам Качак гуртысь калык вашкала дырысен «Дырды» ошмеслэн вуэныз пайдаяське. Кытысь со потэмын, кинэн нырысьсэ тупатэмын шуыса гуртысьтызы тужгес но арлыдоез но уг тоды ни, дыр. Нош ошмес бызе, котькуд нунал калыкез юзмыт вуэныз шумпоттэ.

2014-тӥ арын «Единая Россия» партилэн «Реальные дела» проектэз улсын «Дырды» ошмес выльдӥськиз, котыр ласянь утялтӥськиз. Со дырысен отчы вулы ветлыны умойгес но капчигес луиз: угось ошмесэ васькыны тубатъёс тупатӥзы, вуэз котыртӥзы но липет улэ пыртӥзы.

Ваньмыз утялтэмез яратэ. Аръёс ортчыса, ошмес котыре куакъёс будӥзы, тубатъёс сисьмизы. Таӵе суредэз адӟыса, качакъёс «Дырды» ошмеслы юрттыны вуизы. «Зеленая Башкирия» акция улсын гуртоос ошмес котырез утялтӥзы, жуг-жагез октӥзы, «Дырды»-ез выль писпуосын узырмытӥзы.