Нимысьтыз военной операциысь ожгарчи дышетскисьёсын пумиськылӥз

Татышлы ёросысь ожгарчи тушмон пумитэ частичной мобилизация улсын султӥз. Удмурт пи нимысьтыз военной операциын позывной быръён пумысен кема ӧз малпаськы, сое дор палъёсыныз герӟаны малпаз. Ассэ «Башкир» шуиз. Но берло тодмо луиз, вӧзаз мукет «Башкир» вылэм на шуыса. Соин ожгарчиос огкылэ вуизы: удмурт пи аресэзъя пичигес бере, со «Малой» луоз. Ож лудын капчи ӧвӧл ке но, «Малой» уг ӝожтӥськы, со ӟеч мылкыдын азьпала вамыштэ.  Татышлы ёросысь Выль Татышлыысь пиналъёсын пумиськонын но солэн вордӥськем шаереныз данъяськон мылкыдыз, со понна тушмон пумитэ кышкатэк вамыштэмез шӧдӥськиз. Со улосчиосызлы секыт вакытэ ожгарчиослы юрттэмзы понна пумтэм тау каре. Шаермес утисен пумиськемзы бере пиналъёс валазы, макем умой сайкыт инбам улын улыны шуыса. Таӵе ик шуныт пумиськон ортчиз Калмияр школаын но. «Малой» понна со тужгес дуно луиз, дыр, малы ке шуоно татысь борддоръёс сьӧрын ортчиз солэн пинал дырыз.