Республикаын "Трезвое село" проект ужзэ азинтэ

Туэ но проект республикаысь пӧртэм интыосын одӥг малпанэн улӥсьёсты огазеялоз. Калтасы ёросысь гуртъёс программае котькуд ар сямен мылысь-кыдысь пырисько. Удмуртъёс но проектлэсь палэнэ уг кылё. Кылсярысь, пӧртэм аръёсы «Трезвое село» проектын Бадӟым Качакын, Бадӟым Туганеевоын но Чиндэрын улӥсьёс асьсэды котьма ласянь усто возьматыны быгатӥзы. Бадӟым Туганеевоын улӥсьёс республика этапе потыса кужымзэс мертазы. Жаляса верано, туннэ нуналэ Калтасы ёросысь удмурт гуртъёс вормисе потыны ӧз быгатэ. Озьы ке но, калык кизэ ӧз лэзьы, осконзэ ӧз ышты. Туэ ёросысь 11 гуртъёс конкурсэ пыриськозы, соос пӧлы Бадӟым Качак гурт но пыремын. Качакъёс огъя кенешонын нош ик асьсэды возьматыны  вераськизы.

Вераны кулэ, «Трезвое село» проект калыклэсь улонзэ умой пала воштэ. Ужрадъёс, пумиськонъёс гуртъёсты но городъёсты огазеяло, калыклэсь улонзэ яркытгес но тунсыкогес каро.