Калтасы ёрос юбилейзэ пусйиз

Ӵукнаысен кутскыса бер ӝытозь но Калтасыын шулдыр крезьгур куараос ӧз чалмытске. Ёрос центрлэн одӥгаз урамаз башкир, бигер, ӟуч, пор но удмурт коркаосын калыкъёслэсь эшъяськыса улэмзэс но сям-йылолъёссэс возьматӥзы. Со сяна, та нуналэ Калтасы ёрослэн азинсконаз бадӟым кужым понэм адямиосты данъязы. Кылсярысь, Ю.М. Садыровлы «Почётный гражданин Калтасинского района» ним сётӥзы. Юрий Минзарипович трос аръёс ӵоже ёрос администрациен кивалтӥз. Солэн тыршеменыз ёрос учкымон чебертскиз, синмаськымон луиз.

Праздникын куноосты удмурт калыклэн сям-йылолъёсыныз но лулчеберетэныз Бадӟым Качакысь но Бадӟым Туганеевоысь «Зангари» но «Марӟан» ансамбле ветлӥсьёс тодматӥзы.

Нош бадӟым ужрадлэн  шорсюлмыз «Ший кандыра» («Серебряная веревочка») пор эктонъя регионъёс куспысь фестиваль луиз. Башкортостан Республикаысь, Свердловск улосвылысь, Татарстанысь но Удмурт Элькунысь вуэм пор коллективъёс кырӟаны но эктыны быгатэмзэс возьматӥзы, калыкез  асьсэлэн лулчеберетэнызы матысьгес тодматӥзы.