Школаын СВО-ысь ожгарчиен пумиськон ортчиз

Вордскем гуртаз шутэтскыны вуэм пиосмурт аслаз дышетскем школаяз шумпотыса лыктӥз. Угось ож бусыосы татысь пиналъёслэсь трос шуныт гожтэтъёс вуо. Ожгарчилэн кылъёсызъя, соос нылпиосмылэн шудо пичи дырзы понна тушмонлы пумит мыно. Дор палась вуэм гожтэтъёс кезьыт окопъёсын шунто, азьлань мыныны кужым но шудо улонлы оскон сёто.

Ожгарчи кык арлы матэ нимысьтыз военной операцие пыриське. Соин туала югдурез со телевизорысь но радиоысь иворъёс пыр гинэ уг тоды, странамылэсь секыт вакытъёссэ ас вылаз шӧдэ. Нылпиос пиосмуртлы огез бере огез юанъёс сётъязы. Соослы ваньмыз тунсыко потӥз: кытын ожгарчиос уло, ма сиё, гожтэтъёс но гуманитарной юрттэт басьто меда? Ожгарчи вань юанъёслы пыр-поч валэктонъёс сётӥз.

Школаын пумиськон нылпиослы пайдаё луиз. Зэмос ожгарчиен вераськыса, соос туала улонлэсь ужпумъёссэ  валазы. Пиосмурт пиналъёслы вормонэн бертыны кыл сётӥз. Дышетскисьёс солы оскизы, пичи синъёсазы нимысьтыз военной операциысь геройен данъяськон тылгизьы ӝуатскиз.

Фото: Наша школа №2