Алтауын удмурт шӧмо праздник ортчиз

Бурай ёросысь Алтау гуртын улӥсьёслэн котькуд ужрадзы бадӟым праздниклы пӧрме. Угось гуртоос мылысь-кыдысь ужаны но, сюлмысь шутэтскыны но быгато.

Кыкетӥ гудырикошконэ алтауос Выль нянез вакытаз ортчытыны ӧз быгатэ. Соку гуртоос турын дасян ужъёс бордын тыршизы. Нош удмурт сям-йылолэн герӟаськем нуналэз мултэс ӧз каре: бере кыльыса ке но, шулдыр но паськыт пусйизы.

Гуртысьтызы библиотекарьлэн М.Г. Гафутдиновалэн кичӧлтэмезъя, «Емышен узыр та дыр» ужрадэ алтауос быдэс гуртэн люкаськизы. Урамазы соос сиён-юонъёсын кузь ӝӧк пуктӥзы. Шутэтскон нуналзы тунсыко шудонъёстэк но шулдыр удмурт гуръёстэк ӧз ортчы. Удмурт дэремъёсын кышномуртъёс бубылиос выллем поръязы. Удмурт шӧмо прадзник гужем ужъёслэсь жадем калыклы выль кужым сётӥз. Ӵошен чай юыса но кырӟаса ортчытэм вакытсы алтауосты огазеяз но эшъяськон мылкыд кузьмаз.

Фото: Виктор Марданов