Улонэз ческыт чечыез выллем веръяно

Кылем толэзьын гинэ соос вить поллэсь трос пӧртэм экскурсиосы потазы. Озьы арлыдоос Башкортостанысь, Татарстанысь но Удмурт Элькунысь тунсыко интыосы вуылӥзы. Кема ӧвӧл гужем нуналъёсты пайдаен ортчытыны малпасьёс Караиделе, Павловской водохранилищее экскурсиен потӥзы. «Звёздный» физкультурно-оздоровительной комплексын соос кык нунал ӵоже шутэтскизы. Павловской водохранилищеез арлыдоос теплоходэн котыртӥзы, «12 апостолов» гурезьёсын тодматскизы. Со сяна, шутэтскисьёс Байки гуртысь шаер тодонъя музее пыразы, солэн узырлыкезлы паймизы. Нош Караидельысь смотровой площадка экскурсие вуэмъёслы шумпотон мылкыд кузьмаз. Угось отысен татысь интыослэн вань чеберлыксы усьтӥське. Йырез поромытӥсь инкуазь  суредъёс нокинэ но паймытытэк ӧз кельтэ.

Республикамылэсь тунсыко интыоссэ адӟыса но инкуазь чеберлыкен кужым басьтыса, арлыдоос капчи мылкыдэн доразы берытскизы. Азьпалан соосты выль экскурсиос возьмало. Озьыен, Калтасы ёросысь арлыдоослэн улонзы бызись шур выллем жильыртэ. Соослэн верамзыя, улонлэсь котькуд минутсэ пайдаен, ческыт чечыез выллем веръяса  ортчытоно.