Егитъёс проект гожтон бордын тыршизы

 Зэм, сое басьтон понна пӧсяно луэ. Егитъёс но сое ӟеч валало. Соин берло дыре соосты грантъёсын ужаны дышетыса трос семинаръёс, форумъёс радъясько. Татарстанысь Нырья гуртын ортчем «Чакара» фестиваль улсын но со пайдаё ортчиз. Отчы пӧртэм регионъёсысь егитъёс пыриськизы. Сое Камсьӧрысь удмуртъёслэн центрзы улын ужась «Дэмен» огазеяськон ортчытӥз. «Егитъёс нырысь ог-огенызы тодматскыса пӧртэм шудонъёсын шудӥзы. Собере проектъёссэс дасян борды басьтӥськизы, – вера огазеяськонлэн ёзчиез, Калтасы ёросысь шаплы егит пи Данила Ахметшин. – Форумын Башкортостанысь егитъёс но трос чебересь малпанъёссэс шарае поттӥзы. Отын Калтасы, Татышлы, Янаул ёросъёсысь удмурт нылъёс но пиос ужазы». Форумын проект гожтонэ нырысетӥ вамыш гинэ лэсьтэмын. Сое йылаз-пумаз вуттон понна трос малпаськоно на. Проект бадӟым командалэсь валче ужаны быгатэмзэ кулэ каре угось.