Тӧдьы сяськаослэсь тугоко керттӥзы

Ужрадэз радъясь Барабановка клубысь культорганизатор Надежда Кусниярова нылпиослы трос сяськаос дасяз. Угось пӧсьтолэзьысь тужгес но чебер нунал тӧдьы ромашкаосын герӟаськемын.

Чылкыт яратонэз возьматӥсь сяськаослэсь тугоко керттыны трос пиналъёс люкаськизы. Нырысь культорганизатор соослы Семьялэн, яратонлэн но осконлэн нуналэныз герӟаськем сям-йылолъёс сярысь мадиз. Нош собере ужрадэ пыриськисьёс ваньзы ӵош тугоко керттӥзы. Нырысь секытгес мынӥз ужзы, берло кизы дышиз, лэся, тугокоос огзылэсь-огзы чебер пӧрмизы. Нылъёс кема гинэ тугокоосынызы синучкон шорын бергазы. Лэсьтэм ужзы нылпиослы шумпотон но капчи мылкыд кузьмаз.

Фото: Барабановский СК