Бускельёс ке вань…

Гуртазы тунсыко ужрад радъяны малпазы клубын но библиотекаын ужасьёс Светлана Садыкова но Ольга Садриева. Ужрадэ Иткинеево гурт поселенилэн администрациеныз кивалтӥсь Альфрид Минязов но пыриськиз. Альфрид Адипович Каймашабаш гуртын улӥсьёслэсь тыршись, ужез гажась, куно пумитась сямо луэмзэс, тупаса улэмзэс, пусйиз.

Ужрадэз концерт азьланьтӥз. Учкисьёслы шулдыр мылкыд кузьмазы гуртысь «Капчи мылкыд» вокал ансамбль но нылпиослэн эктон коллективъёссы.

Та нуналэ бадӟымъёсты но, пичиосты но узыр программа витиз. Огазеямын вал «Буккроссинг», «Дармаш», «Планткроссинг», «Своих не бросаем» акциос. Соос улсын ужрадэ лыктэмъёс книгаосынызы, арбери-дӥськутъёсынызы, будосъёсынызы вошъяськыны, гумюрттэт возьматыны быгатӥзы. Со сяна, «Угости соседа» фуршет ялэмын вал.

Ужрадэз шудонъёс азьланьтӥзы. Соосты радъяны юрттӥзы дышетӥсьёс но визьнодасьёс. Шулдыръяськон эшъяськонлы сӥзем эктонэн, ӵошен чай юонэн йылпумъяськиз. «Ужрадэз ортчытыны юрттэт возьматӥсьёслы – гурт калыклы, Каймашабашысь, Каймашаысь потыса, та дыре палэнын улӥсьёслы, Иткинеево гурт поселенилэн администрациезлы, «Победа» СПК-лы» - бадӟым тау, - гожтэ вк вотэс бамаз О. Садриева.

Фото: Каймашабашская библиотека Янаульского района