Вылысь Татышлыын гуртэн вӧсь ортчиз

Озьы туннэ, 6-тӥ инвожое, Татышлы ёросысь тросаз удмурт гуртъёсын гуртэн вӧсьёс ортчизы. Вылысь Татышлыысь удмуртъёс но туэ дасэтӥ ползэ вӧсь лудэ люкаськизы, Инмар-Кылчинлы вазиськизы. Отчы пичиез но, мӧйыез но вуыны мылкыд кариз. 

Та нуналэ шуныт зоръёс, шыпыт, тыро улон но вань ӟечсэ курыса Инмар-Кылчинлы вӧсясьёс Риф Адисанов, Гайнелзян Минхаматов но Олег Иванов вазиськизы. Соослы пӧраны Валентин Гайнетдинов, Вячеслав Мелиатов, Юрий Муллаяров, Николай Марданов, Павел Арсланов но мукетъёс юрттӥзы. Тыл вылын пӧзьтэм, ӵын шӧмо ӝукез котькудӥз ас понназ куриськыса веръяз.