Нылпиос шутэтско но, тазалыксэс но кыдато

Татчы нырысетӥ инвожое ик республикаысьтымы но Удмурт Элькунысь удмурт пиналъёс люкаськизы. Лагерьын соослэн мӧзмыны дырзы ӧвӧл. Быдэс нунал татын пӧртэм ужрадъёс ортчо угось. Со куспын пиналъёс пӧртэм ӧръёсъя быгатонлыксэс но волятыны быгато. Туэ нырысьсэ «Военно-патриотическое» ӧр усьтӥськиз.  Сое  Татышлы ёросысь Улысь Балтач школаысь дышетӥсь, «Патриот» клубен кивалтӥсь Р. В. Губаев нуэ. Радмир Владимирович бадӟым саклык висъя нылпиослэсь тазалыксэс кыдатонлы, соослы вордскем шаеренызы данъяськон мылкыд пыӵатонлы. Со дыре ик сюлмаське, пиналъёслы лагерьын мӧзмыт медаз луы шуыса. Соин татын соос винтовка сэрттыны-люканы но, турникын ӝуткаськыны но, футболэн шудыны но вутско. Выль ӧре кызьлэсь трос пиналъёс ветло, соос пӧлысь тросэз - пиос.