Уж дуразы шумпотыса вамышъязы

Котькуд адямилэн аслаз улон сюресэз. Кин ке гуртын будыса, городэ улыны интыяське. Мукетъёсыз вань улонзэс гуртсылы сӥзё. Пермь шаерысь Куеда ёросысь Киргаысь Ираида но Леонид Валиахматовъёс но нырысь гуртсылэсь палэнын - Березникиын – улӥллям. Ираида Шайхутдиновна выж ӝутон удысын бетонщицалуыса ужам, Леонид Валиахматович заводын тыршем.

Кузпалъёслэн мылкыдзы котьку гуртэ кыстӥськем. Куать ар городын улэмзы бере, соос Ираида апайлэн вордскем гуртаз, Киргае, бертӥллям. Кузпалъёслэн ужан аръёссылэн бадӟым люкетэз «Выль сюрес» СПК-ен герӟаськемын. «Ужлэсь ӧм кышкалэ, - шуэ Ираида Шайхутдиновна. – Котькуд нунал дыртыса уж дуре вамышъямы». Зор-кот-а, ӟырт кезьыт-а – номыр шоры учкытэк, шунды ӝужатозь Ираида апай фермае скал кыскыны дыртэ вылэм. Аслэсьтыз ужзэ вить чиньызэ кадь тодӥсь адями валам угось, ужез вакытаз йылпумъяно шуыса. Ираида Шайхутдиновна котьку азьветлӥсьёс радын луэм. Солэн ужез уно данъетъёсын пусъемын. «Егит дыръя котькыӵе уж борды кышкатэк басьтӥськиське. Скалъёслы ӝог дыши. Собере фермае выжы лэзи кадь:1981-тӥ арысен пенсие потытозь Киргаысь фермаын скал кыскисьын ужай. Нырысь киын кыскиськом вал. Котькуд группаын 18 скал лыдъяськиз. Берло ини, аппаратъёс луэмен, ужмы капчияз. Лёня пенсие потытозяз хозяйствоямы сварщикын ужаз», - вера Ираида Шайхутдиновна.

(Быдэсак лыдӟе газетлэн 18-тӥ номерысьтыз).

Автор:Миляуша Булатова

Читайте нас

Партнеры