Кузьдалае тэтчасьёс ӵошатскизы

Судьяос нырысь пиослэсь быгатонлыксэс эскеризы. Татын котькудӥз тэтчась зол кужымзэ возьматӥз, уго бызьыса кузьдалае тэтчанлы школаязы но трос саклык висъяло. Пиос ог-огзылэсь лыдпуссэс ортчон понна кужымзэс жалятэк тэтчазы. «Молодец! Заступ эн кары!» - кылӥськизы физкультурая дышетӥсьёслэн куараоссы. Уг тодӥськы, кылӥзы меда соослэсь верамзэс пиналъёс, озьы ке но куронзэс быдэстыны тыршизы. Тэтчан площадкаын Выль Татышлы школаысь Иван Манаповлы удалтӥз. Со 4,92 метре тэтчиз. Кыкетӥ но куинетӥ интыосы Бадӟым Качакысь Даниил Галиуллин но Бадӟым Гондырысь Данил Темиркаев потӥзы.

Нылъёс пӧлынӵошатсконын зол кужымзэ возьматӥз Улысь Балтач школаысь Элина Ушиярова. Со нырысьсэ тэтчыкуз ик котькинлэсь кыдёке вуиз. Ӵошатсконын кыкетӥ интые потӥз Шудекысь Сафина Гатауллина, куинетӥе – Выль Татышлы школаысь Валерьяна Мусакаева.