Субботникъёс гуртлэсь чеберзэ утьыны юртто

Та нуналъёсы тросаз городъёсын но гуртъёсын субботникъёс ортчизы. Отчы Татышлы ёросысь Калмияр школаын дышетскись пиналъёс но пыриськизы. Соослэсь ужзэс Калмияр но Петропавловка гуртъёсын улӥсьёс шӧдӥзы. Нылпиос дышетӥсьёсынызы ӵош сюрес дуръёсты но мукет интыосты тазатӥзы. Та нуналэ соос асьсэос но паймизы, вылды, тол куспын люкаськем трос жуг-жаглы. «Дышетӥсьёс но  дышетскисьёс арлы быдэ та выллем ужрадъёсы пырисько, гуртъёсмес чылкыт возьыны юртто», - быдэстэм ужзы понна тау карыса гожтӥз гурт поселенилэн администрациеныз кивалтӥсь П. М. Мардамшин.

Таӵе субботникъёс нылпиосты гуртлэсь чеберзэ валаны, сое утьыны дышето. Соос валало, жуг-жаг тырон понна котькуд гуртэ нимысьтыз контейнеръёс интыямын шуыса. Со сярысь медаз вунэтысалзы бадӟымъёс но. Соос пӧлысь котькудӥз контейнер сярысь тодэ ке но, куддыр сюрес вылтӥ ширтӥсь машинаосысь но ӟенеликъёс «лобо», егитъёслэн шутэтскем интыосазы но жуг-жуг быдэс мешок тыр люкаське. Таӵе югдур туннэ нокинлы паймымон ӧвӧл. Соин нюръяськон понна ог-огедлэсь, тужгес нылпиослэсь, быдэстэм ужзэс гажаны дышетсконо.