Сак луэ: тудву ӝог ӝутске

Тудӟем ву юртъёслы, гурт хозяйствоослы, электролиниослы, ву но газ гумыослы, пудо-животъёслы но адямиослэн улонзылы кышкытлык вае. Тулыс шурын луэм кышкыт учыръёслэн но лыдзы йылэ. Ву дуре мыныку, сак луоно. Йӧлэн зӧкталаезлы осконо ӧвӧл: сое шунды сиос, виясь ву ӝог шунто.

Туэ тулыслэн вуэмез шӧдтэк шорысь луиз, шуыны луоз. Тудвулэсь кужымзэ но кышкытлык ваемзэ шӧдӥзы Башкортостанысь Архангельской ёросын улӥсьёс – Инзер шур ярдуръёсысьтыз потыса, Азово гуртэз зӥбиз. Та дыре отын оперативной штаб ужа. Юрттэт возьматӥсьёс 103 адямиез эвакуировать каризы. 80-эз, со пӧлысь 17-ез нылпиос, огдырлы улон интыосы интыямын. Соосын психологъёс но соцработникъёс ужало. Шуге-леке шедемъёслы улыны вань луонлыкъёс чакламын.  

- Та югдурез но тудвуэн сэрен мукет интыосын кылдэм учыръёсты пыр-поч эскерыса улӥськом. Архангельской ёросын сяна, Белорецк, Благовар, Гафури ёросъёсысь улон интыосты ву зӥбиз. Тудвуэн сэрен секыт югдуре шедиды ке, 112 номеро телефонъя вазиське, - гожтэ вотэс бамаз БР-лэн тӧроез Радий Хабиров.