Шаермес утисьёс гурт калыклэсь юрттэтсэ мед шӧдозы

 Тросэз ужъёссы гуртысьтызы культура юртын быдэстӥсько. Нош алигес соос отчы кема кысӥсьтэм шырпу но окопной сюсьтыл дасяны люкаськизы. Огъя кужымен шудекъёс 74 сюсьтыл но 410 кема кысӥсьтэм шырпу лэсьтӥзы. Матысь дыры сое ваньзэ шаермес утисьёслы келялозы.
«Парафин но мукет со выллем арбериосты басьтыны благотворительной концертын поттэм коньдон юрттӥз», - вера гуртысь библиотекарь Людмила Садыкова.Ӵапак солэн кичӧлтэмезъя Шудекын таӵе акция радъяськиз. Со выль малпанзэ «Оптимист» клубе ветлӥсь нылкышноослы шараяз. Соос бадӟым ужзы борды ваньзы ӵошен кутскыны вераськизы. Нылкышноослы юрттыны гуртысьтызы пиосмуртъёс но, нылпиос но вуылӥзы. Озьы соос арняяз кык пол культура юртэ люкаськылӥзы.
Та нуналъёсы шудекъёс ужзэс йылпумъязы. Азьланяз соос мукетыз борды кутскозы. Табере ваньзы огинэ кариськыса масксетка керттозы.