Ужез гажась калык вылын возиське гуртлэн чеберез но данэз

Пичи дыръям коркаос но пичиесь, сьӧдэсь вал. Куд-огезлэн липетъёссы но куролэсь луизы. Собере улон пырак воштӥськиз. Гуртамы улӥсьёс чебересь, бадӟымесь коркаос пуктӥзы. Трос ужась калык вал гуртын. Колхоз быремен, гуртысь трос семьяос палэнэ улыны кошкизы. Кузётэм коркаос сисьмизы, кенеръёссы куашказы. Нош гуртамы кылем адямиос ог-огзылы юрттыса уло. Алтауэз выль коркаос шулдырто, ураме гравий вӧлдэмын, юбоосын тылъёс ӝуало. Нылпиосмы палэнэ кошкемын ке но, соос шумпотыса гуртэ, анай-атай юртазы берто.

Гурт чебер мед луоз шуыса, сое утёно. Со ласянь милям татын туж бадӟым уж мынэ. Куасьмем, пересьмем писпуосты ваньзэ вандӥзы, кенеръёсты выльдӥзы. Кузётэм, пограны вуэм коркаосты сэрттӥзы, тазатӥзы, соос интые пинал писпу мерттӥзы.Ураме гудӟем гудӥзы, соосты чебер липет улэ интыязы. Тӥни кыӵе тыршись адямиос уло гуртамы!  Калыклы вазисько ке, ваньзы ӵошен ужаны пото: пересез но, пиналэз но. Ӵошен ужад ке, котьмае вормыны луэ. Та ужъёсын кивалтэ гуртмылэн старостаез Айвар Ялалов.

Быдэстэм ужъёсыз но адӟытыны быгатоно. Та бордын ужа Виктор Марданов. Со туспуктэмъёс но, видеороликъёс но лэсьтэ. Тани кыкетӥ арзэ ни «Трезвое село» конкурсэ пыриськиськом, вормыны тыршиськом. Вань гурт калык со бордын ужа. Мар гинэ ум кариське: шудӥськом но, ужаськом но, эктӥськом-кырӟаськом но, куное но ветлӥськом. Та ужъёсын кивалто клубен кивалтӥсь Ирина Шарафутдинова но библиотекарь Марина Гафутдинова.

Шумпотыса верасько: тани таӵе адямиос вылын возиське гуртлэн чеберез но гуртлэн данэз.

Фаина БАЙМЕТОВА.