Нылкышноос волейболэн шудӥзы

Шаермес утисьёслэн нуналаз пиосмуртъёс школаысь спортзалын теннисэн ӵошатсконъёсы пыриськизы. Нош толон, куатетӥ южтолэзе, нылкышноос волейболэн шудӥзы. Вожвылъяськонзы Нылкышноослэн нуналзылы сӥземын вал. Ӵошатсконэ Бадӟым Качак гуртысь куинь урамъёсысь командаос пыриськизы. Пионерская но Молодежная, Садовая, Советская урамъёсысь кышномуртъёс чебер шудон возьматӥзы. Соос понна «висисьёс» но ӧжыт ӧй вал. Качакъёс ужрадэ быдэс гуртэн сямен люкаськизы. Котькуд ӵошатсконын аслаз вормисез луэ. Татын но кужмоосыз шараяськизы. Тужгес но чебер но кужмо шудон возьматыса, Садовая урамысь команда нырысетӥ интые потӥз. Советская урамысь волейболэз яратӥсьёс кыкетӥ интые потӥзы, нош Пионерская но Молодежная урамысь команда куинетӥ интые кылизы. Бадӟым Качак гурт поселенилэн администрациезлэн но Краснохолмскийысь ужбергатӥсьлэн Сария Хузиналэн коньдонэн юрттэт возьматэменыз, котькуд команда ӵошатсконысь кузьымен кошкиз.

Вераны кулэ, Бадӟым Качакысь та выллем спорт ужрадъёс школаысь физкультурая дышетӥсьлэн Григорий Тимирбаевлэн кичӧлтэмезъя ортчо. Григорий Юлкубаевич котьку калыкез огазеяны быгатэменыз висъяське. Солэн тыршеменыз Бадӟым Качакын тазалыко улон нуиське, спорт ужрадъёсын но качакъёс котьку вормисьёс пӧлын луо.