Нылкышноос лымы вылын футболэн шудӥзы

 Туннэ, 5-тӥ январе, кылсярысь Вуж Вараше трос куноос люкаськизы. Вуж Варашысь нылкышноослэн «Девчата» но Нанядыысь «Эшъяськон» командаоссы татчы футболэн шудыны вуизы. Кузёос соос пумитэ «Оба-на» командаенызы султӥзы. Соосты Выль арен ӟечкыланы Тол бабай но лыктӥз. Футбол площадкаын пумиськон капчи но шулдыр ортчиз. Татын эшъяськон мылкыд кузёяськиз угось. Озьы ке но отын кузёослы вуисьёс ӧз луэ – «Оба-на» команда нырысетӥ интые потӥз. Кыкетӥ интые потӥзы Выль Варашысь нылкышноос, куинетӥын – Нанядыысь.

Вераны кулэ, 4-тӥ январе татысь культура юртын ӝӧквыл теннисэн шудон но ортчиз. Отын пиос пӧлын вормизы: Андриян Тимирбаев (нырысетӥ инты),Константин Алитдинов (кыкетӥ инты), Радмир Шакирзянов (куинетӥ инты). Нош нылкышноос пӧлын  нырысетӥ интые Любовь Суфиярова потӥз. Кыкетӥ но куинетӥ интыосын Тамара Низамутдинова но Людмила Тимирбаева луизы.