Ужазы сюлэм шунытсэс, ӟеч сӥзёнъёссэс пуно

Та ужез арлыдоос но, егитъёс но, пиналъёс но быдэсъяло. Ермекей ёросын волонтёръёслэн «Здесь и сейчас» клубзы ужа. Соин Энже Шафикова кивалтэ. Клублэн ёзэтъёсыз гуртъёсын но кылдытэмын. Купченейысь «Кузьыли» сизьым толэзь ужа. Отчы пыриськисьёс маскировочной сеть кертто, нимысьтыз военной операцие ыстыны гумконвой дасяло. «Кузьылиен» кивалтӥсь Римма Константинова вера:

- Ми, Купченейын улӥсьёс, масксеть керттыны дышетскыны кутским толшор толэзе. Бускель гуртэ ветлыса дышетским. Милемлы отчы вуылыны техникаен юрттӥз Суккулово гурт поселенилэн администрациеныз кивалтӥсь Олег Никитин. Со понна Олег Михайловичлы бадӟым тау шуиськом. Оштолэзьысен Купченей[1]ысь школае маскировочной сеть керттон инты тупатэмын. Со дырысен «Кузьыли» ваньзэ 17 масксеть керттыса, ож лудэ ыстэм.

- Гуртын, ёросын благотворительной амалэн люкам коньдон масксеть керттыны материал басьтыны юрттэ. Соосты Касимов, Санкт-Петербург го[1]родъёсысь заказэн басьтӥськом, - вера Римма Раилевна.

 – Ужмы дугдыса уг улы. Нылкышноос ваньмон дырзэс сеть керттонлы сӥзё. Та ужез тыршыса быдэсто гуртысь волонтёръёс Римма Раилевна Константинова, Надежда Владимировна Амосова, Ольга Алексеевна Семёнова, Нина Алексеевна Пургина, Галина Петровна Никитина, Наталья Алексеевна Константинова, Светлана Евгеньевна Никитина, Нина Андреевна Спиридонова. Соос ужазы сюлэм шунытсэс, ӟеч сӥзёнъёссэс пуно.

- Котькудмы уж борды ӟеч малпанъёсын кутскиськом, умоезлы оскыса ужаськом, ожгарчиослэсь Вормонэн бертэмзэс витиськом, - вера Р. Р. Константинова. – Ӟечезлы осконмы ноку уг ышы. Милям пунэм масксетьёс пиосты одно ик тушмонъёслэсь утёзы.