Бусыен пыраклы герӟаськем улон

Янаул ёросысь Нанядыын вордӥськем но будэм Фёдор Сабирзянович Тимирзянов аслэсьтыз улонзэ гурт удыслы сӥзиз. Трос аръёс ӵоже бусылы синмаськем мылкыдзэ со номырин ӧз вошты. «Мон - гуртын вордскем адями, котыр инкуазьлы, гурт улонлы синмаськемын. Городын лулы пытсаське, гаде шокамысь дугдэ кадь. Соку кыре потыса, кузь кыстӥськись бусые вуыса, чылкыт омырен шокаме потэ. Бусы мынам вирам пыӵамын. Уй но, нунал но мон отын. Пичиысен бусы ужез валаса будэмын. Атае куамын куинь ар ӵоже комбайнэн ужаз. Мон гужем со сьӧрысь уг кылиськы вал. Вазь ӵукнаысен бер ӝытозь ӵошен ю тысь октӥм. Соку ик синмаськи, дыр, яркыт шунды ӝужанлы, вазь ӵукна азвесь сямен ворекъясь лысвулы, зангари сяськаослы но сюлэмез чепыльтымон чебер шунды пуксёнлы», - малпанъёссэ шарая Фёдор Сабирзянович.

Вуж Варяшысь тямыс классэз йылпумъяса, Фёдор Тимирзянов вӧзысьтызы Ямадыысь шор ёзо школае вуэм. Угось соку ик егит пи интститутэ пырон сярысь малпаськыса улэм. Жаляса верано, соку льӧль малпанэз быдэсмымтэ: Ижевскысь гурт удысын ужасьёсты дасянъя институтэ пырыны быгатымтэ. Егит пи гуртысьтызы колхозэ рядовой луыса ужаны интыяськем.

Армиын ветлыса, улонын пыд йылаз султэм Фёдор Тимирзянов семья кылдытон сярысь малпаськыны кутскем. Егит шулдыр улон умой ке но, оген чебер ӧвӧл ни. Анай-атаез но быдэ вуэм пизэс кузпалъяськыны куриллям. Нош улонын куремен гинэ уг луы вылэм, адямиез, пе, адӟонэз нуллэ. 1978-тӥ арын Выль Киргае Гырон быдтон празднике вуыса, егит пи отысь ныллы синмаськем. Чиль-чиль сьӧд йырсиё нылмурт пиосмуртлэсь сюлэмзэ пыраклы аслыз карем. Кӧня ке пол пумиськыса, 1979-тӥ арын Фёдор Тимирзянов Лариса Гиниятовнаез кузпаллы дораз ваиз.

Кылемзэ лыдӟе газетмылэн 20-тӥ шуркынмонэ потэм номерысьтыз.