Выль корка бадӟым кузьым луиз

Васиуллин кузпалъёс «АгроМ» ООО-ын ужало: Ефим Шарипович фермаен кивалтэ, кузпалыз – осеменатор. Зэм, Надежда Шариповна, кулэ луиз ке, хозяйствоын котькуд ужез ас вылаз басьтыны быгатоз. Кузпалъёслэсь сюлмысь тыршемзэс кивалтэтсы но шӧдытэк уг улы. Хозяйствоен кивалтӥсь Рудольф Шарафутдинов кун программае пыриськыны соосты юнме ӧз ӵекты. Васиуллинъёс валало, кунмы ӧй юрттысал ке, таӵе чебер пуктон уж секытэн сётӥськысал. Уго со вакытэ нылъёссэс дышетон, соосты пыд йылазы султытон сярысь но малпаськно на вал. Туннэ бадӟымез Люба нылзы Ижевскын юрист луыса ужа. Веразылэн ужез чугун сюресэн герӟаськемын луоз, али со Самараын тодон-валан басьтэ.

Кузпалъёс выль юртазы улыны выжемзылэсь азьвыл атаенызы улӥзы. Шарифьян Енекеевич табере огназ ке но улэ, нылпиоссы понна со пумтэм шумпотэ, быгатэмезъя соослы юрттыны но тырше. Егитъёслэн ужзы ӧжыт ӧвӧл угось: гидазы пудозы трос, бакчазы картофкаен, пӧртэм емышъёсын узыр. Юртсы но городын выллем тупатэмын ни – котькытын зэмос кузёослэн киоссы шӧдӥське.

- Коркамес ньыль толэзь куспын ӝутӥзы, - вера Ефим Шарипович. -  Со понна ми бадӟым тау шуиськом ужбергатӥсьлэн Байрам Гадиловлэн ӝутӥськонъя бригадаезлы. Соос ужзэс ӟеч но  вакчи дыр куспын быдэстӥзы. Соин ми кунмылы, республикамылэн, ёросмылэн, хозяйствомылэн кивалтэтэзлы таӵе бадӟым кузьымез понна котьку тау шуиськом.

Дасямын «Янаульские зори» газетъя.    

Фото: Рустам Сангов.