Киужъёсыз шумпотон кузьмало

Татышлы ёросысь Уразгильды гуртын киужен вырыны яратӥсь, паймымон нылаш улэ. Нимыз но солэн аспӧртэм, шер пумиськись – Русина. Азьло Русьын вераллям, та ним, пе, ангеллэн нимыз, кудӥз адямиез вордӥськем дырысеныз кышкытлыкъёслэсь утьыса улэ.

Русиналы 25 арес. Со аслыз кельшымон ужен выре: туж яратэ керттӥськыны. Кӧня ке ар ӵоже ни веньёсын но курикен керттӥське. Кутскем ужзэ йылаз-пумаз вуттэ ке, Русина шумпотэ. Со сяна, солэн ужъёсыз матысьёсызлы но, вӧзысьтыз адямиослы но шумпотон кузьмало. Нылашлэн сюлэм шунытсэ поныса быдэстэм ужъёсыз мукетъёсты но «кенжыто». Керттӥськонлэн аспӧртэм кужымез но вань: урод малпанъёсты палэнтэ, стрессэз быдтэ.

Аслад киосыныд пӧрмытэм арбери котьмалэсь но дуно луэ. Русиналэн «шыкысысьтыз» пӧртэм-пӧртэм салфеткаосты, ялыкъёсты, шапкаосты шедьтыны луэ. Киужъёсыз нылашлы но, дорысьёсызлы но шумпотон кузьмало, корка пушсэс шулдырто.Со сяна, нылаш чебер суредаське. "Солэсь суредъёссэ адӟыса, мылкыд ик ӝутске", - шуо тодмоосыз. 

Фото: Филиал реабилитации с.Верхние Татышлы