Калык ужтэк уз кыльы

Калтасы ёросысь Бадӟым Качак гурт поселениын улӥсь калык тросэз «Победа» ООО-ын тырше.  Качкинтурай гурт вӧзы интыяськем бадӟым фермае гуртъёсысь ужасьёсты нимысьтыз машина нуллэ. Коньдон ласянь но татын тыршисьёс уг ӝожтӥсько: кивалтэт ужась калыкез яратэ, уждун умой тыре. Со сяна, «Победа» ООО ужась калыкезлы котьма ласянь  юрттыны тырше, котькуд кылдэм юанъёсты но ужпумъёсты пыр-поч эскере. Огазеяськонлэн кивалтэтэз калыкен ӵем гинэ пумиськонъёс радъя, угось ӵошен вераськонъёс ноку мултэс уз луэ, ужын но огкылэ вуыны юрттозы.

Туннэ, 17-тӥ сентябре,  ортчем пумиськонэ «Победа» ООО-лэн кивалтӥсез Р.Р. Низаметдинов гинэ ӧвӧл, ёрослэн тӧроез  З.Т. Габдуллин но солэн гурт хозяйствоя воштӥсез А.К. Хамидуллин вуэмын вал.  Соос Бадӟым Качак гуртын улӥсь калыклы «Победа» ООО-лэн луонлыкъёсыз сярысь веразы. Та нуналэ огазеяськонын ужаны мылкыд карисьёс но луизы. Соослэсь уже пырон сярысь заявлениоссэс отысен ик кутӥзы.