Чылкыт омыр, задор мылкыд, ӟеч малпанъёс…

Дышетскисьёс но, дышетӥсьёс но дырлэсь ортчемзэ ик ӧз шӧдэ, шуыны луоз. Соосты пӧртэм ужрадъёс витизы угось.

Нырысь пиналъёс асьсэлы интыяськыны шулдыр инты бырйизы, котырзэс жуг-жаглэсь утялтӥзы. Биологиен дышетӥсь Гульфира Самирзянова нылпиослэсь «визьзэс сыназ»: тодо-а соос будосъёсты? Кыӵе будосъёс пайдаё луо? Вань-а пӧлазы тазалыклы кышкытлык ваисьёсыз?

Физкультураен дышетӥсь Радмир Губаев 8-11-тӥ классъёс понна спорт ӵошатсконъёс радъяз. Эскеронъёс военно-патриотической ӧрлы сӥземын вал. Нылъёс но пиос зол кужымзэс возьматӥзы.

Покчи классъёс понна дышетӥсьёссы пӧртэм шудонъёс дасяллям вал. Нош 11-тӥ классын дышетскисьёслэн сюрессы кузьгес луиз: Россиысь географической обществолэн интыысь ёзэтэныз кивалтӥсен Генрих Баймиевен ӵош соос Куснияр ошмесэ вуылӥзы. Та ошмесэн гужем пайдаясько «Рассвет» хозяйствоысь скал кыскисьёс. Кыдёкын ик ӧвӧл скалъёслы гужем лагерь интыяськемын угось. «нылпиос огъя малпанэ вуизы – Куснияр ошмесэ нош ик лыктыны, солэсь котырзэ утялтыны», - гожтэ вк вотэс бамаз Г. Баймиев.

Фото: Татышлинское местное отделение РГО в РБ