Дышетскисьёс ӟеч тодон-валан мед басьтозы

Таяз дышетскон арын Пермь шаерысь Куеда округысь школаосын 3132 нылпиос понна чингыли жингыртӥз: 11-тӥ классын 82 пинал дышетске, 9-тӥ классын – 382. Нош нырысетӥ классэ мынэмъёслэн лыдзы 261-лы ӵоша.

Бадӟым Гондырысь школа но дышетскисьёссэ шумпотыса пумитаз. 11-тӥ куарусён соос понна праздник выллем луиз: школаын «Точка роста» дышетонъя центр усьтӥськиз. Табере дышетскисьёслэн луонлыкъёссы паськытаз. Соос естественно-научной но технологической ӧръёсъя узыр но мур тодон-валан басьтыны быгато.

Дышетонъя центрез усьтон ужрадэ пыриськизы Куеда округлэн администрациеныз кивалтӥсьлэн воштӥсез Павел Коноплев, округысь дышетонъя управлениен кивалтӥсь Марина Трубинина, дышетон удысысь ветеранъёс, дышетӥсьёс, нылпиос, анай-атайёс но гуртлэн улоназ азинлыко пыриськисьёс. Соос пиналъёслы выль вормонъёс, ваньзэ умойзэ сӥзизы.

Торжественной люкет бере дышетонъя центрын экскурсия радъямын вал. Нош «Точка роста» центрысь дышетӥсьёс но пиналъёс выль оборудованиосын ужан амалъёсын тодматӥзы.

Фото: Куединский районный методический центр