"Усточикар" лагерьысь нылпиос шулдыр концерт возьматӥзы

Та нуналэ интыысь культура юрт ӵаш вазиз, татын шаплы удмурт нылъёс но пиос кузёясько шуыса шӧдӥськиз.Пиналъёсты учкыны калык но трос люкаськиз. Азьпалтыса верало, концертлэсь поттэм коньдонэз нимысьтыз военной операцие пыриськисьёслы юрттэтлы келяны чакламын.

Концертын трос чебер удмурт кырӟан гуръёс чузъяськизы. Та нуналэ вуриськисьёс но, суредаськисьёс но зэмос артистъёс выллем адскизы. Вакчи дыр куспын вуриськисьёс, кылсярысь, дэрем, ошет, шопер вуриллям. Суредаськисьёс ужъёссы пыр лагерь улонэз, татысь пӧртэм ӧръёсты возьматыны быгатӥллям.  Нош «Фольклор»,  «Эстрада», «Театр» ӧръёсын быгатонлыксэс волятӥсь пиналъёс та нуналэ зэмос пичи кизилиос выллем пиштӥзы. Концерт лагерьлэн берпуметӥ нуналаз возьматоно ужрадэ дасяськон выллем луиз. Со 21-тӥ августэ ортчоз. Отчы котькуд мылкыд карись пыриськыны но та нуналэ сямен ик нылпиослы шуныт  кичабонъёссэ кузьманы быгатоз.