Коньдонэн пытсаськем синъёс

Зэмзэ верано ке, куддыр, возьыт ке но, нылкышноос понна дурбасьтыны кышкасько. Кема ӧвӧл Вылысь Татышлыысь одӥгаз вайвожын руль сьӧрын аспоннам тышкаськыса пуконо луи. Пӧртэм гуртъёсын улӥсь кышномуртъёс  бадӟым вайвожын пумиськиллям. Соос ог-огенызы кемалась адӟиськиллямтэ ни вылэм, луоз. Ваньмыз сярысь вунэтыса, киосынызы кытчы ке палэнэ возьматыса маке сярысь верасько. Со куспын одӥгез мороженойзэ но нюлыштыны вутӥське. Нылкышноос эмъюртэ лыктӥллям, лэся, висись пыдъёссэс ӵошатскыса сямен ог-огзылы возьмато.

Сьӧрам сылӥсь машиналэн кузёез таӵе суредэз учкыса сылыны ӧз чида ни. Со укнозэ усьтыса нылкышноослы кесяськыны кутскиз. Нош соос шумпотыса сямен машиналэн кузёез шоры учкизы. «Ортче, кин тӥледлы люкетэ?» - шуизы кадь соос. Сюресэз усьтӥзы бере, нылкышноослэсь вераськемзэс учкыны ӧз пӧрмы ни, азьлань ширтоно луиз. Со куспын азям кунгож сьӧрысь вуттэм машина потӥз. Шумпотӥ, мон борды ӧз мертчиськы, синзэ усьтыса вуттӥз шуыса. Уд оске, руль сьӧрын нош ик кышномурт пуке. Соин сюресмы но тупаз, эмъюрт пала шонтӥм. Кӧня ке мыныса, нылкышно паллян пала поворотниксэ ӝуатӥз. Нош эмъюртэ бур пала кожоно. Нылкышно монэ пӧяны гинэ малпам, лэся, машиналэн питранъёсыз эмъюрт пала берыктӥськизы. Егит ныл пумитаз лыктӥсь машинаез но пӧяны йӧндыриз. Солэн руль сьӧрын пукись пиосмурт нош ик кышномуртъёсты тышкаськыса кошкиз, вылды.

Сюрес вылысь та выллем учыръёсты мон дугдытэк вераны быгатысал. Но нылкышноосты сокем зол «ушъяны» уз луы, ачим но соос пӧлысь луисько угось.  Кышномуртъёс сюрес вылын сомында янгышало бере, пиосмуртъёслэсь но шекъёссэс шедьтыны уг лу меда? Соос руль сьӧрын вашкала дырысен ни зэмос кузёос ке но, чик уг янгышало шат?

Михаил вазь ӵукна ик уж дураз мыныны потӥз. Сюлмаськонъёсыз туннэ лачак. Сое школаын но возьмало, мукет интыосысь но трос пол вазизы ни. Уж дураз но ваньзылы маке кулэ. Будильникез куаразэ сётыса ӧз вутты на вал,  кивалтӥсезлэсь трос куронъёссэ кылоно луиз ни. Соин Михаил туннэ сюрес вылысь но нокинэ уг адӟы. Мугез но вань угось: школае дыраз ӧз вуы ке, коньдонэз ныр ултӥз ортчоз. Арлы быдэ со тулыс куазен отчы юрттӥськыны вуылэ. Туэ но тӥни со ласянь пӧртэм ӧз луы. Тыршемез понна трос коньдон сётомы шуыса оскытӥзы. Пиосмурт туж дыртӥз ке но, сюрес урдсы кошкем тодмо машиназэ синйылтыса вуттӥз. «Э-э-й, толон праздник вал ук, - серем пыр малпаз со ас понназ. – Юыса руль сьӧры пуксёно ӧвӧл. Тӥни кыӵе шонаськыса сылэ». Михаил кышкыт учыре шедем пиосмуртэн одӥг гуртын будэмын. Озьы ке но дугдыса тодмоезлэсь тазалыксэ чакланы дырыз ӧз луы. Яке дугдэмез понна коньдон уз сётэ шуыса малпаз? Тодмо ӧвӧл. Нош машинаен кышкыт учыре шедем адями юэмын ӧй вал. Та нуналэ солы чылкак тодмотэм воргоронъёс юрттӥзы: бекыртӥськем машиназэ султытӥзы, пиосмуртлэн тазалыкез сярысь юалляськизы.

Мишалы удалтэ, лэся, сюрес вылын та выллем учыръёсын. Алигес вазь ӵукна ик тодмо нылкышнозэ машинаен донгытыны шедьтӥллям. Тупаны но кулэ ук озьы, та нуналэ кузпалзэ эмъюртэ дырызлэсь вазьгес вуттоно. Миша сюрес дурын пукись нылкышно шоры пал синмыныз учкиз но, азьпала ширтӥз. «ГИБДД-е ивортӥллям, озьыен, юрттэт луоз», - малпаз со. Нылкышно кема пукиз на сюрес дурын. Миша кузпалзэ келямез бере олокӧня пол со доры вуыны быгатысал на. Озьы ке но пиосмурт кышкыт учыр луэм интые ӧз вуы. Шумпотоно, нылкышно тодмоезлэсь вӧзтӥз ортчемзэ ӧз синйылты шуыса. Со понна кӧтӝожез сое кема сюпсьысал на.

*

Улонын пӧртэм дыр луэ: туннэ тон зарниен пыласькиськод, ӵуказе дэрие выйиськод. Ачид секыт югдуре шедьыку гинэ янгышез шӧдыны луэ, вылды. Соку ортчемзэ сю пол берлань берыктысалыд но, гырпумдэ уд куртчы ни.